उम्मेदवारी दर्ताको विषयमा पोखराको ईन्जिनियरिङमा झडप

 उम्मेदवारी दर्ताको विषयलाई लिएर पोखराको लामाचौरस्थित ईन्जिनियरिङ संस्थानको पश्चिमाञ्चल क्याम्पसमा झडप भएको छ।

नेविसंघ र अनेरास्ववियुले उम्मेदवारी दर्ता गर्न जानु अघि नै एमाओवादी निकट अखिल क्रान्तिकारीले निर्वाचन कार्यालयमा तालाबन्दी गरेपछि दुबै पक्ष बीच झडप भएको हो । झडपका क्रममा केही विद्यार्थी र प्रहरी घाइते भएका छन् ।

क्रन्तिकारीले ताला खोल्न नमानेको र नेविसंघ, अनेरास्ववियुले उम्मेदवारी दर्ता नगरी नर्फकने अडानले क्याम्पसमा झडप शुरु भएको थियो । झडपमा ७ जना विद्यार्थी र ४ प्रहरी घाइते भएका छन् । उनिको पोखराको मणिपाल अस्पतालमा उपचार भैरहेको छ । घाइते हुनेमा अखिल क्रान्तिकारीका विकास नेपाली, नारायण बडाल, राम, नेपाल प्रहरीका लोक बहादुर भट्टराई लगातका रहेका छन् ।

क्रन्तिकारीले केन्द्रीय नीति अनुसार कार्यालयमा ताला लगाएको बताएको छ । एउटा पक्षले ताला लगाएको र अर्काेले खोल्न आएपछि विवाद भएको निर्वाचन अधिकृत माधव प्रसाद शर्माले बताए । दुई पक्षबीच झडपको अवस्था आएपछि निर्वाचन प्रकृया क्याम्पस प्रशासनले सुचना टाँस गरि स्थगित गरेको छ । आज बिहान १० बजे देखि २ बजे सम्म उमेद्वारी दर्ताको कार्यक्रम रहेको थियो ।

अहिले सुरक्षाको लागि क्याम्पस परिसरमा शसस्त्र प्रहरी र नेपाल प्रहरीलाई परिचालन गरिएको छ ।